تجاوزت أعداد سكان الجمهورية منذ ساعات التسعين مليون نسمة بحسب الإعلان الذي أصدره الجهاز المركزي للتعبئة والإحصاء والشاشة العملاقة في شارع صلاح سالم .

و"الحكاية" تقدم سبعة حلول للتحكم في الزيادة السكانية الهائلة على حساب الموارد عن طريق تقليل الإنجاب والقتل البطئ للمواطنين.. عزيزي المواطن ركّز معايا لازم نضحي :

1 – استرجع مشاهد رحلة المنتخب من ساعة ما قالوا كاس عالم وإعرف أنك هتعيش وتموت ومش هنصعد.. وإفتكر دايمًا أن المصريين مواليد 1935 ماشافوش مصر في المونديال غير مرة زيهم زي أي " ورور " مواليد 1990 .. لأنك أكيد عارف أن مصر ماهوّبتش ناحية البطولة غير سنة 1934 و1990 بس , إفتكرت ؟!
افتكر كمان مجدي عبدالغني وشوف كل لقاءاته وأحاديثه عن ضربة جزاء في ماتش خلص تعادل في الدور الأول في البطولة وخرجنا منه كمان..  وخليك متأكد أنه واللهِ فاكر أنه عمل أهم حاجة في تاريخ مصر الحديث بجد, حتى لو هزّر وعمل إعلانات وإفيهات على نفسه..
2 – إنزل الشارع واشتبك مع المواطنين الشرفاء.. أهم مواطنين في العالم, عاشقين نظرية المؤامرة , اللي بينظروا في السياسة وبيأيدوا أي حاجة ويحبّوا يتصوروا في الشارع ويقولوا رأيهم ويفرضوه ويأكدوه في برامج التوك شو في المُداخلات.. ويقوموا بمهام الداخلية ويخوّنوا أي حد مش معاهم .
فاستفزهم وهما هيقوموا معاك بالواجب إن شاء الله .

نموذج لمواطن شريف

3- طيب.. توفيق عكاشة بكامل قواه العقلية قال أنه ممكن يمسك رئاسة الحكومة أو البر.. البرلم.. البرلمان , وقال أنه مُفجر ثورات.. أقسم بالله العظيم قال كده , وأكيد حاجة واحدة منهم بس كفيلة تخليك تفكر تاني في كونك لسة عايش لحد دلوقتي وبتقرا .

عكاشة : أنا مفجر ثورات
 

 4 – الدنيا زحمة جدًا في الشوارع.. مش كده ؟

تصفيات كأس العالم – مصر والجزائر2009
 الهتاف في الإستاد كان ( سبعين مليون مصري بيقول يارب )

أغنية يلا نشجع بلدنا
 

سبعين مليون مصري في 2009 .. تمام ؟,  ده معناه أن لو مشينا على نفس المعادلة دي  إننا بعد 10 سنين هنبقى أكتر من 120 مليون  مصري , فليه تستنى لغاية ما تعيش لليوم ده؟  .. قلتلي لسه بتشتكي من الزحمة والمواصلات ؟

5 –  روح السجل المدني أو أي مصلحة حكومية بس ماتتعاملش غير مع الموظفات الستات.. الستات بس .
الرجالة هتعمل ايه يعني أخرهم " الشاي يا باشا " أو هيعطلك المصلحة بشكل أو بأخر, حاجات عادية .
الستات واللهِ جحيم من نوع تاني ما ينفعش يتكتب حتى.. روح يوميًا لمدة إسبوع مثلًا  .
 

6- خلي حد من أهلك يربطك في كرسي الصالون المُدهب ربطة مُحكمة ويغميلك عينك أو يغطي التليفزيون " بملاية شديدة السواد " واستمع بتركيز للإعلامي " أحمد موسى " وأحلم معاه .. صوت فقط .. الأداء كفيل بقتل بطئ غير رحيم . ( مُجربة )  

مثال : فيديو جيم  روسيا

7 – انصت لهزار المذيع والمذيعة ع الراديو.. وافتكر أنك بتقول إفيهات أحسن منه بس طفحان وبتاخد ملاليم ومحدش عارفك ومفيش بنت معبراك أصلًا عشان تنكّت معاها .